ACT 1.4

Action am Mëllerdall

Du wëlls eng onvergiesslech Woch am Mëllerdall verbréngen? Du bass fit um Vëlo, hues Loscht mat neien oder ale Frënn sportlech a méi relax Aktivitéiten ze erliewen an an dräi verschiddene Jugendherbergen ze schlofen? Da bass du hei genau richteg! Mir freeën eis drop, mat dir de Mëllerdall ze entdecken!

Hierschtkolonie

De Summer ass eriwwer, dobausse gëtt et méi kal… mee dat heescht net dass de Spaass een Enn muss hunn.

Hutt dir Loscht op een onvergiesslecht Erliefnis am schéine Lëlz beim  Stauséi, da sidd dir hei genau richteg. Kanu fueren, Spiller am Bësch, Ausflich op aner schéi Plazen, sinn nëmmen e puer vun deene ville flotte Saachen déi mer hei zesummen erliewen waerten. Pak der eng gutt Portioun Spaass an deng Valise a maach dech prett fir d’Hierschtkolonie. Mir freeën eis op dech.

Formatiounswoch 1er Cycle (semaine de formation B)

Wëlls du Kanner eng flott Vakanz bidden an dobäi selwer vill Spaass hunn? Da bass du op dëser Woch genee richteg! Praxisorientéiert léiers du wéi ee Kanner mat Spiller, Atelieren a méi, animéiert, wéi e Grupp funktionéiert a wéi een an enger Moniteursequipe zesumme schafft a sech ameséiert fir sou de Kanner eng onvergiesslech Zäit ze bidden. Fills du dech ugesprach? Da mell dech séier un, fir gutt Stëmmung ass op alle Fall gesuergt…

Alles kee Problem! (weekend de spécialisation)

Animateur sinn op enger Kolonie ass verbonne mat enger Reih Erausfuerderungen a Froestellungen : Wéi reagéieren ech op Autoritéitsproblemer a Regelverstéiss bei Kanner ? Wat kann ech man, am Fall vu Kommunikatiounsschwieregkeeten ënnert den Animateur’en? Wéi ginn ech em mat Léift a Sexualitéit op der Kolonie?

Zesumme mat iech wëlle mer oppen iwwer dës an aner Froen diskutéieren, eis an déi jeeweileg Situatioun a Persounen eraversetzen an op dës Manéier verschidde Léisungsvirschléi erschaffen.

Teambuilding (weekend de spécialisation)

TEAM – Together Everyone Achieves More? Einer für alle, alle für einen? Zesumme si mer staark? Was wir alleine nicht schaffen, das schaffen wir dann zusammen?

Alles nëmme blöd Spréch oder ass wierklech eppes drun, datt een zesumme méi erreecht? Fir dat erauszefannen, kucke mir eis verschidde kooperativ abenteuerlech Aktivitéiten un, déi e Grupp zesummewuesse loossen. Virwëtzeg a prett fir Teambuilding? Da mell dech séier bei eis un!

Wiichtelchersweekend

D’Wieder gëtt rëm méi kal an den éischte Schnéi fänkt u mat falen. An domat fänken och d’Wiichtelcher u sech op Chrëschtdag virzebereeden. Well d’Wiichtelcher awer nieft de Kaddoen, déi se virbereeden och ganz gäre spillen, bastelen a baken, géifen si sech driwwer freeën, wann’s du dëst Joer mat denge Kollege bei si géifs kommen. Si erwaarden dech a 40 aner kleng Wiichtelcher fir dir hiert grousst Räich ze weisen.

Formatioun fir Formateuren (Fir d'Formateure vun den Animateur A Formatiounen)

Dës Formatioun riicht sech u Mataarbechter aus Gemengen, Organisatiounen oder Maisons Relais’en, déi wëlles hunn, Animateuren (Brevet A) fir d’Vakanzaktivitéiten oder d’Maisons Relais’en auszebilden. Theme vun dëser Formatioun sinn ënner anerem non-formal Bildung, gesetzlech Basis, Hëllefsmëttel fir Animateuren a Formatiounstechniken.

Konditioun: en Diplom am sozio-edukative Beräich hunn (Educateur, Educateur gradué, Pädagog, etc.)

D'Formatioun ass validéiert: Referenznummer: 2018_12_ANB_61

Wéi organiséieren ech eng Kolonie?

Eng Aktivitéit als Responsabel (Camp/Kolonie/Weekend) beim SNJ/GA organiséieren; wat kënnt do op mech duer? Dëse Stage gëtt dir en Abléck an de Pabeierkrich, déi engagéiert Responsabilitéiten, d’Zesummesetzen an d’Leede vum Staff an d’Entwécklung vu Konzepter a Strukturen, fir deng Aktivitéit ze plangen an duerchzeféieren. Mir wäerfen och e Bléck op dat ganzt Material, wat sou op enger Aktivitéit zesummekënnt.

Fir un dësem Stage deelzehuelen, solls du schonn en Animateur C Brevet hunn a schonn op eng Erfarung vun e puer Campen a Kolonien als Animateur kënnen zréck kucken.

 

 

Wanterkolonie

D’Elfen hu fir Chrëschtdag ganz gutt a vill geschafft. Alleguerten d’Kanner op der Welt kruten hir Cadeau’en a jidderee grinst vu Freed. Éier si lo awer an de Summerschlof ginn, rufe si sech nach eng Kéier op. D’Melou ass do an de Jennes, deen ass zwar schonn ageschlof, mee ass och do. No an no ginn all d’Nimm opgeruff, bis op eemol: “Fränz? Wou ass de Fränz?” Wanns du rausfanne wëlls, wat mam Fränz geschitt ass, cool Spiller, Freedefeier a villes méi erliewe wëlls, da mell dech an den Kollege séier op der Wanterkolonie un!